平時online傾偈、返工寫report、返學寫paper……識得打中文幾乎係漢語圈國家必不可少嘅技能。廢話，其正常程度好比英語國家嘅人識打英文、日語國家嘅人識打日文、五毛黨嘅人識得打五毛文……

我哋知道，中國北方嘅朋友打字常用北方話拼音（汉语拼音），台灣嘅朋友打字常用註音（注音）。噉粵語地區係點輸入中文嘅呢？

省城係點呢？成個廣東係點呢？廣西係點呢？香港係點呢？澳門係點呢？海南係點呢？其它國家嘅華人社區又係點嘅呢？

請勿列舉！零二係知嘅。呢啲「阿媽係女人」嘅說話就無謂多講嘞。

粵語區嘅打字生態豈係一個QQ表情足以表達嘅？

π_π 個問題嘅重點唔係幾多個QQ表情呀！仲有，最後嗰個笑乜春？

如果有人：①想教人學中文，或者②自己想學好中文，呢種咁混亂嘅情況都會令人卻步。另外，呢個亂象亦係普遍粵人嘅打字以至整體語文運用能力都稍遜（係落後好多就真！）其他語言使用者嘅重要原因！

現時網上有唔少呢啲「学打粤语字」「拼音打粤语常用字攻略」之類嘅教學，但實情係……

▲ 網上一啲教大家以北方話拼音打粵字嘅方法

感謝呢啲作者嘅貢獻，但係希望佢哋可以澄清返呢啲係臨時解決方案，係冇辦法之中嘅臨時解決方法，而非長久之計。零二要藉此呼籲各位網友唔好被呢啲「攻略」所誤導。到目前仲用緊呢種輸入方式嘅朋友須知，呢啲做法只係冇辦法嘅辦法。若長期依賴，會成爲影響自身語言思維嘅惡習。唔好睇小其破壞力，每當你用別種語言嘅拼音打一個字，你個腦就只會review嗰個字喺嗰種語言嘅發音一次，而非粵語。換言之，你必先經過其它語言嘅發音去思考粵語，然後再打出來。即係變相將自己嘅母語由第一語言退化成第二語言，而不自知。長此以往，不經不覺間你嘅講話習慣、發音、語言組織能力就會受到呢啲不正當輸入方式嘅嚴重破壞。

而有人會話：「唓，邊有咁嚴重呀？我都唔識拼音嘅。我平時用搜狗輸入法打粵語，咪一樣講粵語，邊有影響呀？」

零二：噉咪錯晒囉！唔識拼音、唔識用母語打字，反而要依賴其它語言嘅拼音輸入自己嘅語文，呢個現象就正正就係問題所在。回想一下：自己平時係點樣打字嘅？

網絡上有各種錯字、別字、英文發音代替嘅亂象：

▲ 粵文錯別字嘅亂象

▲ 想知上面呢啲錯別字嘅改正建議同點樣用拼音打出嚟，請睇此文→

咁多奇奇怪怪嘅錯字，

皆因不少網友從前只能依賴一啲反人類嘅輸入方式打字：

▲ 以北方話拼音打粵文嘅現象

各位，社會需要正常，

用其它語言嘅輸入法臨時解決當前打字需要係okay嘅，但係習慣咗就會對自身同母語生態造成不良影響，成爲惡習，故應儘早戒除。

零二重申：要輸入乜嘢語言就用乜嘢語言嘅輸入法打字方爲正路。

既然已經知道有正常嘅打字法，何不先打爲快呢？

（而家就撳此連結下載輸入法）→

零二寫此贅文，皆因有唔少網友、卜卜齋嘅觀眾、Facebook group嘅組員向零二提過「我本身識中文」「點解要學拼音呀？」「會唔會好難學？」「而家用搜狗輸入法都打得嗻」……之類嘅說話。相信而家唔少朋友睇咗呢篇文就會明白學識拼音嘅重要性。既然大家已經知道咗點解要學拼音，噉除非自己平時鍾意用倉頡、速成或者筆劃等等字形輸入法打字啦，否則而家就要好好學習用拼音打字喇。

文明打字，做正常人。Okay？

零二日後會再介紹多啲學習拼音嘅方法，敬請期待。

不過經驗話畀零二知，目前最快嘅學習拼音嘅方式莫過於：

而家就點擊此連結下載輸入法啦！

之前嘅文章都有介紹唔同嘅輸入法，特別係小狼毫輸入法嘅反查功能，用來學習拼音效果極佳。相信只要大家做到坐言起行、改正日常嘅中文打字方式，就一定可以提升個人嘅語文水平、重拾母語語感。